Түркістандықтар Дидар Хамзаны Рио Олимпиадасына шығарып салды

Түркістан қаласындағы «Ә.Нұрмаханов атындағы облыстық олимпиада резервін даярлайтын спорт мектебінің» түлегі Дидар Хамзаны жерлестері Рио Олимпиадасына шығарып салу рәсімін өткізді.

Аталған мектептің ұйытқы болуымен «Түркістан Ахмет Аяссауи» мешітінде өткен шараға қаладағы игі жақсылар мен спорт жанашырлары және дін өкілдері жиналды. Осы кездесу барысында 19 жастағы дзю-до күресінің шебері, жас батыр Бекзат Саттархановтан кейін араға 16 жыл салып Олимпиада ойындарына қатысқалы отырған Дидар палуанға түркістандықтар сәттіліктер тіледі.

Осылайша ыстық ықыластарын жеткізген көпшілік арасында Бекзаттың әкесі Сейілхан Саттарханов «Менің ұлым Сидней Олимпиадасына аттанғанда ұстазы берген Құран кітапты оқи алмаса да жанынан тастамай, ақтық ойынға шығар алдында Ермахан ағасы екеуі қасиетті кітапты көкіректеріне қысып ниет еткен екен. Ендеше Дидар балама да Бекзатымның жеңісін тілеймін. Сол үшін жаныңа серік болсын деп, мына Құран кітабын арнайы алып келдім», деп батасын берді.

Сонымен қатар, қаланың бас имамы Омар Елеуұлы бастаған дін өкілдері жамағатпен бірге өткен әр намазда дұға тілейтінін жеткізіп, Құран бағыштады. Және де қала әкімінің орынбасары Д.Тәңірбергенов әкімдік атынан палуанға шапан жауып, сый-сыйяпат жасады. Айта кетерлігі, барша жерлестеріне шексіз алғысын айтқан Дидардың жеке бапкері әрі асқар тау әкесі Марат Файзиев ұлының дүбірлі додадан жүлдемен оралуына мүмкіндігі бар екендігін жеткізді.

Айта кетейік, әлемдегі 73 келідегі ең таңдаулы 22 дзю-дошы қатысатын Олимпиадаға Дидар бір қадам жетпей қалған болатын. Яғни 23 орында тұрған жас палуанның алдында тұрған спортшының белгілі себептермен жарыс жолынан шеттетіліп, осыдан 3-4 күн бұрын ғана шақырту алған Дидардың ендігі үміті жеңіс. Дзюдодан Қазақстан ерлер құрамасы тек үш жолдама иеленсе, енді олардың саны тағы толықты. Дидар Хамза Риода 8 тамыз күні татамиге шығады.