Қазақстандық тасымалдаушылар Ресей аумағында жүк тасымалдау үшін қосымша 4000 квота алды
Қазақстан Республикасы мен Ресей Федерациясы арасындағы халықаралық автомобиль қатынасы туралы үкіметаралық келісім аясында автомобиль көлігі бойынша Қазақстан-Ресей аралас комиссиясының кезекті отырысы өтті. Бұл туралы ҚР ИДМ баспасөз қызметі хабарлайды.
Қазақстандық тарапқа ҚР Инвестициялар және даму министрлігі Көлік комитетінің төрағасы Әсет Асаубаев, ресейлік тарапқа Автомобиль және қалалық жолаушылар көлігі саласының мемлекеттік саясат департаментінің директоры Алексей Бакирей жетекшілік етті.
Отырыс барысында тараптар Қазақстан мен Ресей арасындағы жүк тасымалы көлемі жөнінде ақпарат алмасып, халықаралық автомобиль тасымалының қарқынды дамуын атап өтті.
2016 жылдың қорытындылары бойынша Қазақстан мен Ресей арасындағы автомобиль көлігімен жүк тасымалының көлемі 10,6% артты. Автокөлікпен негізінен құрылыс тауарлары, өсімдіктен жасалған өнімдер, дайын тағам өнімдері мен тағы да басқа жүктер тасымалданған. Келіссөздер барысында тасымалдаушылардың қажеттіліктерін ескере отырып, биылғы жылға үшінші елдерден және үшінші елдерге жүк тасымалдау үшін рұқсаттар алмасуға қосымша 4000 квота белгіленді. Екі жақ тасымалдаушылардың көлік заңнамасы талаптарын сақтауын, тұрақты автобус бағыттарының жұмысы мен тағы басқа мәселелерді талқылады.