ЖАМБЫЛ ЭКОНОМИКАСЫ КӨШ ІЛГЕРІ

Елбасы Нұрсұлтан Назарбаев биылғы «Төртінші өнеркәсіптік революция жағдайындағы дамудың жаңа мүмкіндіктері» Жолдауында еліміздің даму жолының жаңа тетіктерін айтып берді. Жаңа технологиялар қарқыны көз ілеспес жылдамдықпен көш бастаған заманда тың жаңалықтың, жаңашылдықтың қоғам үшін де қажеттігін айқын жеткізді. Елбасы «Бүгінде әлем Төртінші өнеркәсіптік революция дәуіріне, технологиялық, экономикалық және әлеуметтік салалардағы терең және қарқынды өзгерістер кезеңіне қадам басып келеді. Жаңа технологиялық қалып біздің қалай жұмыс істейтінімізді, азаматтық құқықтарымызды қалай іске асыратынымызды, балаларымызды қалай тәрбиелейтінімізді түбегейлі өзгертуде» деген еді.

Биыл Жамбыл өңірі үшін табысты жыл болып, эконо­миканың барлық салаларында өсім байқалды. Облыс әкімі Асқар Мырзахметовтің бастамасымен өңірді өркендетудің нақты жоспарлары жасалып, облыс аудандарын аралаған, жұмыс барысымен танысқан әкім аудан басшыларына нақты тапсырмалар беру арқылы аудан және ауыл ахуалын жақ­сартуды басты мәселе етіп қойды. Нәтижесінде өңір­­­дің барлық аудандарын­да түрлі салалар қарқынды дамыды. Сондай-ақ, көне шаһар Тараз қаласын абаттандыру жұмыстары да ойдағыдай жүзеге асырылуда.

Облыс орталығында біршама өзге­рістер байқалып, тұр­ғын­дар үшін қолайлы жағ­дай қалып­тасып келеді. Айта кетсек, «Жеңіс» саябағы қайта күрделі жөндеуден өтіп, бүгінде көп­ші­ліктің қызыға тамаша­лай­тын орталығына айналған. Саябақтағы жаңадан орнатыл­ған даңқты батыр Бауыржан Момыш­ұлының ескерткіші, «Ерлік» мемориалдық кеше­ні халқымыздың батыр­­лығы мен тектілігін айғақтап тұр­ғандай. Жыл басынан бері толастамаған мұндай жұ­мыс­тар әлі де жалғасын табары сөзсіз.

Жамбыл облысы әкім­дігінің мәліметіне қарағанда, өткен жылдың тиісті кезеңімен салыстыр­сақ, өнеркәсіп саласы 7,2 %-ға ілгерілегендігін көрсетеді. Осылайша көрсеткіш 254,0 миллиард теңгені құраған. Өсім кен өндіру өнеркәсібінде 13,3 %-ға (29,6 мил­лиард теңге), өңдеу өнеркәсібін­де  6,7 %-ға (180,5 мил­лиард теңге), сумен жабдық­тау, кәріз жүйесі қалдықтар­ының жиналуын және таратылуын бақылауда 0,2 %-ға (2,3 миллиард теңге) артуы есебінен қамтамасыз етіліп отыр.

Сондай-ақ, Жамбыл өңірінде ауыл шаруашылығымен айна­­лысуға мүмкіндік мол. Сонымен қатар, аймақта мал басын асылдандыру, егін орағы жұ­мыс­тары да тиісті деңгейде жүр­гізілуде. Бүгінде, ауыл шаруашылығында нақ­ты көлем индексі 103,6 %-ды құрап, 106,6 миллиард теңгеге жеткен. Оның ішін­де көрсеткіш өсімдік шаруа­шылығында – 105,6 %, яғни 34,6 миллиард теңге, ал мал шаруашылығында – 102,7 %, яғни 71,6 миллиард теңгені құраған.

Бүгінгі таңда, негізгі капиталға салын­ған инвестиция көлемі тиісті ке­зеңмен салыстырғанда 5,5 %-ға артып, 141,8 мил­лиард теңгені көрсетсе, құры­лыс көлемі 8,2 %-ға көбейіп, 59,7 миллиард тең­геге жеткен. Бұл ретте мыңдаған аза­матт­ың бас­паналы болуына мүм­кіндік туды.