ЖАМБЫЛДА «ЫСТЫҚ НҮКТЕЛЕР» ЖОСПАРЫНЫҢ ЖАЙ-КҮЙІ ҚАНДАЙ ?

Рейтинг
15.10.2018, 00:39

Бүгін Жамбыл облысы әкімдігінде «Ыстық нүктелер» жоспарын қарау бойынша жиын өтті. Өңір басшысы Асқар Мырзахметовке облыс әкімдігінің ішкі саясат басқармасының басшысы Берік Құрманғали «ыстық нүктелерге» жататын мәселелер туралы баяндады. Ол өзі басқаратын басқарманың хаттамалық тапсырмаларға сәйкес облыстағы көп уақыт бойы өз шешімін таппаған, қордаланған 9 мәселені анықтағанын жеткізді. Бүгінгі таңда бұл мәселелер мүдделі мемлекеттік органдар тарапынан бақылауға алынғанымен, бірқатар проблемалардың шешімін табу механизмі жүзеге асырылмауда.

 

Басқарма басшысы алдымен еңбек жалақысы бойынша қарыздар мәселесі қордаланған 5 кәсіпорынды тілге тиек етті. Олардың қатарында «ACIG» АҚ және «Энерджи-Тараз», «Hantau Mining», «Шу Сервис», «Қайсар Сарбаз» жауапкершілігі шектеулі серіктестіктері бар. Олардың барлығында 207 жұмыскер алдында 70,4 миллион теңге қарызы бар.

Сондай-ақ, жиында Тараз қаласына қарасты «Құмшағал» және «Шөлдала» шағын аудандары аумағындағы саяжай алқаптарына қатысты, Тараз қаласындағы «Атшабар» тұрғын үй кешеніндегі үлескерлердің пәтер алу, Тараз қаласының су тазалаушы тұндырғыштар мен сүзгілеу алаңдарының, тұрғын-үй құрылысын жүргізу үшін жер учаскесін алуға арналған арнайы кезектің мәселелері көтерілді. Шу ауданындағы «Бөлтірік», «Жиенбет» медициналық және «Сауытбек» фельдшерлік-акушерлік пунктерінің санитарлық талаптарға сай келмеуі, Шу қаласының ескі кәріз жүйесінің, Мойынқұм ауданындағы Радай өзенінде орналасқан көпірдің апатты жағдайы «Ыстық нүктелер» ретінде назарға алынды.

Басқосу барысында көтерілген мәселелерге байланысты тиісті тұлғалардан жауаптар алынып, оларды шешу жолдарын уақыт оздырмай қарастыру керектігі айтылды. Асқар Исабекұлы «Ыстық нүктелерге» жататын түйінді түйткілдер бұл тоғыз көрсеткішпен ғана шектелмейтінін, ел арасындағы, облыс орталығындағы түрлі әлеуметтік-тұрмыстық және экологиялық мәселелерді осы тізімге кіргізіп, тиісті шараларды тездетіп атқару керектігін баса айтты. Жалпы Жамбыл облысындағы шешімін табу кезек күттірмейтін мәселелердің дені тұрғындардың әл-ауқатына тікелей әсер ететін факторлар. Ендеше аймақтың елдімекендеріндегі жергілікті әкімдіктер мен жауапты органдар жуық арада айтылған олқылықтарды реттеуге қатысты нақты іс-шара жоспарларымен бөлісулері керек болады.

Сұхбат

PhotoRoom