Шымкентте білім күніне орай 7 мектеп ашылды

Білім күніне орай Шымкентте 7 мектеп пен балабақша пайдалануға берілді. Осыған орай қала әкімі Ғ. Әбдірахымов жаңадан ашылған білім ұяларының бірі «Сайрам» елді мекенінде орналасқан М. Мәметова атындағы №111 орта мектебінің алғашқы қоңырау мерекелік шарасына қатысты.

«Баршаңызды Халықаралық білім күнімен құттықтаймыз! Бүгін 300 орынды жаңа мектеп білімпаз жасөскіндерге өз есігін айқара ашты. Мен бұл білім ұясын жаңаша ойлай білетін жас ұрпақтың білім алу жолында сараптама жасаудың нақты орталығына айналдырады деп үміттенемін», - деді өзінің құттықтау сөзінде қала әкімі.

Атап айтар болсақ, жаңа мектеп барлық заманауи талаптарға сай. Мұнда жоғары сапалы білім мен салауатты өмір салтын ұстану, балалардың үйлесімді дамуы үшін барлық жағдай жасалған.

Үш қабатты еңселі ғимаратта 23 зерттеу бөлмесі, түрлі зертханалар, лингафон кабинеті, кітапхана, сондай-ақ конференция және оқыту бөлмелері орналасқан.