Бүгін Ордабасы ауданы Бадам ауылындағы «Бадам» индустриалды аймағында полиэтилен бұйымдарын қайта өңдейтін жаңа зауыттың іргетасы қаланды. Инвестиция құны 20 млн. АҚШ долларын құрайтын зауыт жылына 50 мың тонна өнім өндіреді деп күтілуде. Ірі өндіріс орнының қазығын қағу салтанатты шарасына шетелдік бірқатар ірі компаниялардың өкілдері қатысты. Еске салайық, бұл жоба осы жылдың 28-29 сәуірінде өткен «Ontustik Invest-2016» халықаралық инвестициялық форумы аясында қол қойылған ынтымақтастық туралы меморандум шеңберінде жүзеге асып отыр. Аталған жобаны әлемге танымал шетелдік HONGKONG TIANRUN CO.,LTD ірі өндіріс компаниясы облыс әкімдігімен және Green Technology Industries компаниясымен бірлесе отырып салмақ. Бүгінде бұл компания 70 мемлекетте өндіріс орындарын ашып үлгерген. Өңірдің әлеуметтік-экономикасының дамуына серпіліс беретін зауыт іске қосылған кезде 250 адам жұмыспен қамтылады деп жоспарлануда.
Айта кетейік, аталған форум барысында, шетелдік инвесторлар Оңтүстік Қазақстан облысының инвестициялық мүмкіндіктерімен танысып, аймақтың экономикасын дамытудың өзекті мәселелерін талқылаған болатын. Іс-шараға шетелдік компаниялар мен дипломатиялық миссиялардың, халықаралық ұйымдар мен жергілікті бизнес-қауымдастықтардың, сонымен қатар, орталық жергілікті мемлекеттік органдар мен ұлттық компаниялардың және даму институттарының 600-ден астам өкілі қатысты. Бүгінде халықаралық инвестициялық форум өз нәтижесін беруде. Яғни облыста түрлі бағыттарда инвесторлардың көмегімен жаңа жобалар кезең-кезеңімен жүзеге асырылуда.