Жобалық құны 345 млн. теңгені құрайтын «Mega SMART» ЖШС-і қырыққа жуық азаматты жұмыспен қамтыған. Өндіріс орны «Бизнестің жол картасы-2020» бағдарламасы аясында мемлекет қолдауына ие болды. Бір жылда 72 мың плита мен бес мың дана жиһаз шығаруға қауқарлы. Өнімнің елу пайызы ішкі нарыққа кетсе, жартысы экспортталады .
«Тассай» индустриалды аймағында келешекте 25 жоба жүзеге аспақ. Барлығы да халықаралық талапқа сай өнім өндіруге мүдделі. Мемлекет тарапынан жасалған мүмкіндіктер аймақ ажарын арттыра түспек. Инфрақұрылымға кеткен шығын кәсіпкерлердің төлеген салық есебінен-ақ өтеліп жатыр.
Түстік өңірде индустриалды аймақ үшін бөлінген жер телімдерінің ауданы - 976 га. Бүгінге дейін жалпы көлемі 592 га құрайтын жеті индустриалды аймақ пайдалануға берілген. Ағымдағы жылдың соңына дейін бұл көрсеткішті он бірге жеткізу жоспарланып отыр.