Астана қаласында Қазақстан Республикасының Үкіметі мен Өзбекстан Республикасының Үкіметі арасындағы Халықаралық автомобиль қатынасы туралы келісімнің шеңберінде Халықаралық автомобиль тасымалдары мәселелері жөнінде қазақстан-өзбек бірлескен комиссиясының кезекті отырысы өтті. Екі жақты бас қосуда «Шымкент-Ташкент» бағыты бойынша тұрақты автобус қатынасын ашу мәселесі қаралды, деп хабарлайды ҚазАқпарат ХАА. Еліміздің Инвестициялар және даму министрлігінің мәліметінше, келіссөздер барысында тараптар Қазақстан мен Өзбекстан арасында тұрақты автобус қатынасын ашу мәселесін қарастырды және бастапқы кезеңде «Шымкент-Ташкент» маршрутының іске қосылуын пысықтауға келісті. Шара барысында үстіміздегі жылы екі ел арасында жүк тасымалының көлемі артқаны атап өтілді. Отырыс қорытындысы бойынша екі жақтың өкілдері тиісті хаттамаларға қол қойды. Айта кетейік, ағымдағы жылдың бірінші жартыжылдығында Қазақстан мен Өзбекстан арасында автомобиль көлігімен жүк тасымалының көлемі 11%-ға өсіп, 169,5 мың тоннаны құрады. Автомобиль көлігімен тасымалданатын негізгі тауарлар текстиль, кілем, маталар, көкөніс, жеміс-жидектер, пластмасса өнімдері, механизмдер мен жабдықтар болып табылады.