Шымкентте қалалық су жүйесі қалпына келтіріліп жатыр

Шымкентте қалалық су жүйесін қалпына келтіру жұмыстары жүріп жатыр. Жөндеу жұмыстары бірнеше айға созылды. Жұмысшылар арықтар мен атыздарды тазалап, су жүйесінің осал тұстарын қайта қалпына келтірді. Қалалық су жүйесі 90-жылдардың басында-ақ жарамсыз хәлге келген. Бұған қосымша тағы бір жағдай, кәсіпкерлікпен айналысатын қала тұрғындары су жүйесі жүргізілген тұстарға дүкендер мен автотұрақтар салып алған.Дәл қазір билік өкілдері осы мәселені шешуге де күш салып жатыр. Соңғы жылдары күзгі жауын мен қар жауғанда, қала көшелерін су басып қалады. Көктем мен күз мезгілінде қаладағы көліктер суда жүзіп жүргендей күй кешеді. Тұрғын үйлерді де белуардан су басады. Қалалық тұрғын үй коммуналдық шаруашылығы қала тарихында бұл мәселемен алғаш рет тиянақты айналыса бастады. Биылғы жылы су жүйесін қайта жарақтандыруға жарты миллион теңгеден аса қаражат бөлінген. Сонымен қатар су тасқыны кезінде қызыл суды Бадам өзеніне ағызу мәселесі де шешілді. Өткен ғасырда салынған су жіберу жүйесі де қалпына келтірілді.

"Бұрынғы жүйелер баяғы заманда салынған, ескірген. Жыл сайын қаламызда көктемгі су тасқыны мен күзгі жауын кезінде бізде қиын жағдай болатын. Қазір бұл мәселе шешіліп жатыр. Көп жағдай ауа райына да байланысты",- деді қалалық ТКШ бөлімінің басшысы Нұрлан Бектұрсынов.

Ақпарат көзі: 24.kz