Елбасы Н. Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына жолдауын жүзеге асыру аясында өңірдегі Кәсіпкерлерге қызмет көрсету орталықтары мен Кәсіпкерлікті қолдау орталықтарында өзіне-өзі қызмет көрсету аймақтары ашылды. Жамбыл облысында бұл жаңалық міне, қазір 5 ай ішінде үлкен нәтиже көрсетіп отыр.
Өзіне-өзі қызмет көрсету аймағында services.atameken.kz интернет-ресурсы арқылы келуші компьютерді қолдануға және өзі өтініш толтырып, мемлекеттік органдарға жіберуге, мемлекеттік сатып алулар сайтында тіркелуге, бухгалтерлік есеп және салық , ақпараттық технологиялар, құқықтық, кедендік рәсімдеу қызмет түрлеріне тапсырыс беруге мүмкіндік алады.
Осылайша кәсіпкер кеңесшінің көмегінсіз-ақ қажетті қызмет түрін пайдалана алады. Аталмыш қызметтерді services.atameken.kz арқылы онлайн режимінде кәсіпкер үйінде немесе кеңседе, сондай-ақ Қазақстанның және әлемнің кез келген жерінен қосылып, қызмет түрін қолдана алады. Платформаға тіркелу үшін қолданушының телефон нөмірі мен электронды поштасы қажет. Сондай-ақ, services.atameken.kz қосымшасы смартфон арқылы да қолжетімді. «Кәсіпкер сервис арқылы бизнес негіздеріне оқытуға жазылып, қаржыландыру, шығындарды азайту, мемлекеттік бағдарламалар бойынша толық ақпаратты ала алады. Сонымен қатар, қызметтер офлайн режимінде де көрсетіледі.
-«Тараз қаласының «Кәсіпкерлер үйінде» орналасқан Кәсіпкерлерге қызмет көрсету орталығы мен аудандардағы Кәсіпкерлікті қолдау орталықтары жұмыс істеудің жаңа форматына шілде айының ортасынан бастап көшкен болатын. Жаңалық еліміздегі цифрландырудың жүргізілуіне орай және қызмет көрсету рәсімдерін жеңілдетуге бағытталған. «Өзіне-өзі қызмет көрсету аймағында кәсіпкер тарапынан қандай да бір сұрақ немесе қиындық туындаған жағдайда біздің кеңесшілер қолдау көрсетіп отырады. Қолданушы үшін байланыс қызметі мен техникалық көмек қызметі қарастырылған», – дейді Жамбыл облысы Кәсіпкерлер палатасының кәсіпкерлікті қаржылай емес қолдау бөлімінің басшысы Диана Түкпетова.
Өңірлік палатаның мәліметі бойынша, шілде айынан бері аймақтағы 219 кәсіпкер services.atameken.kz платформасы арқылы қызметтерді пайдаланған. Жыл басынан бері Тараз қаласындағы Кәсіпкерлерге қызмет көрсету орталығында 600-ге тарта бизнес субъектісі сервистік қызметтерге жүгінген. Оларға 1043 сервистік қызмет түрі көрсетіліп, жалпы облыс бойынша Кәсіпкерлікке қолдау көрсету орталықтарында тоғыз ай ішінде екі мыңнан астам кәсіпкерге 2630 сервистік қызмет пен кеңестер берілген.
Еске салсақ, былтыр Таразда ашылған «Кәсіпкерлер үйінде» өңір кәсіпкерлеріне кешенді әрі мобильді түрде қызмет көрсету үшін «Жамбыл облысының кәсіпкерлер палатасының Кәсіпкерлерге қызмет көрсету орталығының менеджер-кеңесшілері», «Инвесторларға қызмет көрсету орталығы», «Жергілікті инновация кеңсесі», «Жобалық басқару және цифрландыру кеңсесі», «Казах Инвесттің жергілікті кеңсесі», «Туристік ақпараттық орталық» орналастырылған болатын. Қосымша Халыққа қызмет көрсету орталығы, Жер қатынастары басқармасы, Мемлекеттік сәулет-құрылыс бақылау басқармасы, миграциондық қызмет, екінші деңгейлі банктер, «Даму» қоры мен өзге де қаржы институттарына қызмет көрсетеді. Кәсіпкерлердің үйінде сондай-ақ, «Жергілікті Кәсіпкерлер палатасының» оқыту орталығы бар. Кез келген адамды кәсіпкерлік негіздеріне оқытып, шеберлік сыныптары мен бизнес саласында біліктілігін арттыруға көмектеседі.