«Нұр Отан» партиясы Таразда өтетін Қазақ хандығының 550 жылдығы мерейтойы аясында ата дәстүріміз бен тарихи танымымызға сай болатын үш ауқымды шараның өтуіне ұйытқы болып отыр.
Мерейтойдың шымылдығы ашылатын алғашқы күн – 8 қазанда сағат 11.00-де Баласағұн атындағы концерт залында «Мәңгілік ел» республикалық ақындар айтысы өтеді. Жыр дүлдүлдері сайысының жалғасы 9 қазанда сағат 10.00-де басталады.
Қазақ күресінен «Еуразия барысы» халықаралық турнирі 9 қазанда сағат 11.00-де «Тараз-Арена» спорт кешенінде бастау алса, сағат 14.00-де Тараздың атшабар алаңында «Ұлы дала ойындары» айдарымен ұзақтығы 31 шақырымды құрайтын аламан бәйге, 21 шақырым болатын топ бәйге және 2,4 шақырымнан айналатын ұшқыр жарыс ойындары ұйымдастырылмақ.
Дәстүр мен тарих сабақтастығы ұнасымды үйлесім тапқан шаралардың құрметті қонағы ретінде қатысып, ақындарымыз бен балуандарымызға, шабандоздарымызға жанкүйер болып, демеу көрсетуге шақырамыз.