Түркістан облысында қаржы пирамидасын құрды деген күдікпен алты адам ұсталды

Аймақ
01.09.2020, 09:59

Жәбірленушілер саны 317 адамға дейін жеткен, олардың қатары көбеюі мүмкін

Түркістан облысында қаржы пирамидасын құрды деген күдікпен алты адам ұсталды
Фото: sputniknews.kz

Түркістан облысында қаржы пирамидасын құрды деген күдікпен алты адам ұсталды. Жәбірленушілер саны 317 адамға дейін жеткен, деп хабарлайды Polisia.kz.

Қазір Түркістан облысы Полиция департаментінің тергеу басқармасының өндірісінде ҚР Қылмыстық кодексінің 217-бабы (қаржы пирамидасын құру және басқару) бойынша іс қозғалды.

Бүгін Жетісай, Мақтарал және Шардара аудандарының 317 тұрғыны Ішкі істер органдарына арызданған. Күдікті ретінде 6 азамат қамауға алынды, оның ішінде бір ер адам мен бес әйел бар.

Естеріңізге сала кетейік, жедел-іздестіру іс-шаралары барысында Жетісай АПБ қызметкерлері қаржы пирамидасының қызметін тоқтатқан болатын. Тергеу аясында құжаттар, компьютерлер және басқа да заттай дәлелдемелер тәркіленген. Жетісай аудандық полиция бөлімінің базасында облыстық полицияның тергеу және жедел бөлімшелерінің кәсіби қызметкерлерінен тұратын арнайы жедел-тергеу тобы құрылды.

Тәртіп сақшылары зардап шеккендердің саны артуы мүмкін екенін жоққа шығармайды. Шығын сомасы анықталып жатыр. Қазір осы қылмыстық іс бойынша сотқа дейінгі тергеу жалғасуда.

Сұхбат

PhotoRoom