Сарыөзек әскери гарнизоны қысқа дайын емес – Қорғаныс министрі

Аймақ
24.09.2020, 17:03

Жөндеп жатқан мердігер компаниялардың жұмысы сын көтермейді

Сарыөзек әскери гарнизоны қысқа дайын емес – Қорғаныс министрі

Алматы облысындағы Сарыөзек әскери гаризоны қысқы маусымға дайын емес. Казарма, әскери қалашықтардағы жөндеу жұмыстары уақытылы жүргізілмеген. Өңірге жұмыс сапарымен келген Қорғаныс министрі Нұрлан Ермекбаев Сарыөзек гарнизонындағы ғимараттар мен қазандықтарды жөндеу жұмыстарын қатаң сынға алды..

Министрліктің мәліметінше, жөндеу жұмыстарын жүргізіп жатқан мердігер компаниялардың жұмысы сын көтермейді.

«Гарнизон нысандарын қысқа уақытқа дайындау бірқатар маңызды ескертулер тудырды. Атап айтқанда, министрмен келген комиссияның бағалауы бойынша жылу желілері жылыту маусымына сай дайындалмаған. Әскери қалашық, казарма ғимараттарын жөндеу жұмыстарын аяқтау қараша айына жоспарланған. Бірақ аутсорсинг бойынша тартылған мердігерлер компаниялар келісімді сақтамайды. Қорғаныс ведомствосының басшысы атап өткендей, бұл әскери қызметшілердің жоғары далалық дағдысын ескере отырып, алдағы суық ауа райында қолайсыз болады. Генерал-лейтенант Нұрлан Ермекбаев, мердігер ұйым басшыларынан нысандарды тапсыру мерзімдерін сақтауды талап етті», - деп хабарлайды Қорғаныс министрлігінің баспасөз қызметі. 

Ведомство басшысы десанттық-шабуылдау әскерлерінің қолбасшысына бағынышты гарнизондардағы мердігерлік ұйымдардың жұмысын тұрақты бақылауды жүзеге асыру жөнінде міндеттер қойды және объектілерді қысқа дайындаудың уақытын бекітті. Министрліктің мәліметінше, Н.Ермекбаев конкурстық рәсімдерді өткізудің шарттарына, ұйымдарды лицензиялау, сондай-ақ конкурстарда жеңіске жеткен компаниялардың міндеттемелерін жиі орындамауы, сапаның нашарлығы сынды жағдайларға назар аударып, ескертпе жасаған. Ал, мердігер компаниялар болса әскери нысандарға кіретін рұқсаттамаларды алудың тым ұзақтығына шағымданды. 

«Қалыптасқан жағдайға байланысты министр байқауларды өткізу тәртібі мен шарттарын жетілдіру, командирлер, ҚР ҚК әскерлерін пәтерлерге орналастыру Бас басқармасы, аудандық пайдалану бөлімдері мен мердігерлер арасында міндеттерді бөлу бойынша кешенді жүйелі ұсыныстар әзірлеуді тапсырды. Сондай-ақ, әскери қалашықтардың инфрақұрылымын ұстауды қамтамасыз ету мақсатында осы қызметтерді ұсыну үшін бірыңғай операторды айқындау жөніндегі жұмысты жандандыру тапсырылды», - деді министрліктің баспасөз қызметі.

Есесіне, гарнизонда орналасқан шабуыл және артиллериялық бригадалардың жауынгерлік әзірлігі, техникасы мен қару-жарағын ұстауды министр жоғары бағалаған.

Сұхбат

PhotoRoom