Алматыда жүк көлігі жер астына түсіп кетті

Аймақ
01.03.2021, 18:36

Осы оқиғадан кейін Медеу ауданының тұрғындары жылусыз қалды

Алматыда жүк көлігі жер астына түсіп кетті

Алдын ала мәлімет бойынша, сағат 13:00 шамасында құм-қиыршықтас қоспасы тиелген салмағы 27 тонна КамАЗ пәтерлердің жылу камерасы орналасқан аумаққа кірген.

Жүк тиелген көлік салмағына есептелмеген беткі қабаттағы төсеме шыдас бермей, опырылып түсті. Салдарынан бірнеше тұрғын үй жылусыз қалды.

«Диаметрі 500 мм құбырға зақым келуіне байланысты 336 көпқабатты тұрғын үйді, 86 жеке тұрғын үйді, 9 денсаулық сақтау нысанын, 10 балабақша мен 6 білім нысанын жылу желісінен уақытша ажыратуға тура келді» деп хабарлады «Алматы жылу желілері» ЖШС.

«Алматы жылу желілері» ЖШС жөндеу бригадалары жүргізіп жатқан апатты қалпына келтіру жұмысына 18 маман мен мамандандырылған 4 техника жұмылдырылды.

Жылу мен ыстық су бүгін сағат 23.00-ге дейін қайта қосылады.

Қазір Алматы қаласы Медеу ауданының аумағындағы Қазыбаев-Назарбаев-Достық-Тайманов көшелерінің аумағында орналасқан тұрғын үйлер мен басқа ғимараттар уақытша ыстық су мен жылудан ажыратылды.

«Инженерлер жылу магистралі сегментінің зақымдануы басқа тұтынушыларға жеткізілетін жылу энергиясының параметрлеріне және белгіленген секторда орналасқан ғимараттардағы температура режиміне әсер етпейді», - делінген хабарламада.

Куәгерлердің айтуынша, оқиға Қажымұқан көшесінің бойында болған. Оқыс оқиғадан жүк көлігінің жүргізуші жарақат алған.

Қалалық жедел жәрдем қызметінен хабарланғандай, бас сүйек-ми жарақатын алған жүк көлігінің жүргізушісі ауруханаға жеткізілген.

«Науқастың жағдайы - орташа ауыр. Ол №4 қалалық клиникалық ауруханаға жеткізілді», - делінген хабарламада.

Сұхбат

PhotoRoom