Өскеменде бейбіт күннің батырлары жүздесті
Ұлттық ұлан Бас қолбасшысының орынбасары, Халық қаһарманы, генерал-майор Қайрат Үмбетов ІІІ дәрежелі «Айбын» орденінің иесі, көпбалалы әке Жанасбек Пермабекпен жүздесті. Халық қаһарманы «Шығыс» өңірлік қолбасшылығына қарасты 6699 әскери бөлімінің әскери қызметшісі ефрейтордің үйіне барып, жанұясымен жолықты.
- Бүгін біз 6699 әскери бөлімінің әскери қызметшісі, көпбалалы әке, ефрейтор Жанасбек Пермабектің үйіне арнайы келіп, балаларға базарлық сыйлап, қаруласымыздың отбасымен жақынырақ танысудамыз. Ұлттық ұлан қолбасшылығы қашанда қатарымызда қызмет етіп жүрген көпбалалы отбасыларға ерекше көңіл бөліп, оларға әлеуметтік қолдау танытып келеді. Бүгінгі менің, кезекті қызметтік сапарымда осындай бір өнегелі отбасымен жүздесу сәті түсті. Жанасбектей жауынгердің қатарымызда қызмет етіп жүргеніне мақтанамыз, - дейді Ұлттық ұлан Бас қолбасшысының орынбасары, Халық қаһарманы, генерал-майор Қайрат Үмбетов.
Жанасбек Пермабек биыл маусым айында көзсіз ерлік танытып, жұрт ықыласына ие болды. Өскемен қаласында Үлбі өзенінің жағасында серуендеп жүрген ол суға батып, айналасынан көмек сұраған қызды байқайды. Өзеннің қатты ағысына қарамастан суға лап қойған ол бойжеткенді өзен жағасына шығарады. Жауынгердің жанкешті әрекетінің арқасында қыз өлім аузынан аман қалады. Бұл ерлігі үшін ұландық мемлекет басшысының Жарлығымен ІІІ дәрежелі «Айбын» орденімен марапатталды. Қызметте жаужүрек жауынгер өмірде төрт баланың ардақты әкесі. Іс-шара барысында генерал балаларға базарлық танытып, шаңыраққа шадыман қуаныш сыйлады. Еске салайық, Халық қаһарманы Қайрат Үмбетов те оқу-жаттығу кезінде сарбазды граната жарылысынан құтқарып, ерен ерлік үлгісін көрсеткен болатын. Бейбіт күннің қос батыры қоғамдағы оқиғаларға бей-жай қарамай, жас ұрпақтың бойына Отан сүйгіштік қасиетті дарыту қажеттігін сөз етті. Кеш соңында көпке үлгі болған көп балалы отбасы шаңыраққа арнайылап ат басын бұрған Ұлттық ұлан Бас қолбасшысының орынбасарына алғыс білдірді.
«Шығыс» өңірлік қолбасшылығының баспасөз қызметі