Кооперативке біріккен төлебилік шаруалар 75 мың тонна ет өндіріп экспортқа шығаруды жоспарлауда
Төле би ауданына жасаған жұмыс сапары барысында өңір басшысы Ж.Түймебаев Аққұм ауылдық округіндегі «Тұмар» ауыл шаруашылық өндірістік кооперативінде болып, жұмысымен танысты. Өндірістік кооператив АИО «Оңтүстік» 53 млн теңге, ал «Қаз Агро» қаржылай орталығы арқылы 53 млн. теңге көлемінде несие алған. Жылына 75 мың тоннаға жуық ет өндіріп экспортқа шығаруды жоспарлап отырған мал сою цехында күніне 100 бас ірі қара союға мүмкіндік бар. Мұнда 25 адам жұмыспен қамтылып отыр. Бүгінде етті шетел нарығына шығару үшін бірқатар елдермен келісімдер жүргізілуде екен.
Бұдан бөлек, облыс әкімі табиғаты туризм саласын дамытуға әбден лайық аймақтағы «Ғайып Ерен Қырық Шілтен» киелі орнына барып, қайырымдылық қорының жұмысымен танысты. 1993 жылы құрылған «Ғайып Ерен Қырық Шілтен» қайрымдылық қорының төрағасы Мұхтар Нақыпбеков киелі орынға жылына екі жарым мыңға жуық адам келіп кететінін атап өтті. Сонымен қатар, ол аумағы екі гектар жерді алып жатқан орында келушілерге ыңғайлы жағдай жасау үшін 100 орындық қонақ үйдің құрылысы да жүргізіліп жатқанын жеткізді. Мұнда туристерге арналған қазақтың салт-дәстүрі мен әдет-ғұрпынан сыр шертетін шағын мұражай да бар.
Ауданға жасаған жұмыс сапарын қорытындылаған облыс әкімі атқарылып жатқан жұмыстарға оң бағасын беріп, бұл әр саладағы жаңа бағыт-бағдар арқылы жұмыс жасаудың арқасында қол жеткізілген нәтиже екенін атап өтті. Сонымен қатар, әкім Тәуелсіздік алған 25 жылда ауданда көпқабатты үйлер салынып 480 отбасыны баспанамен қамту мүмкін болған емес екенін айтты. Бүгінде Елбасынының тапсырмасының негізінде жасалған Үкіметтің қолдаулары аясында көптеген шаруа қожалықтар мен өндіріс орындар өз кәсіптерін дамытты. Мемлекеттен берілетін субсидияның арқасында мал сою бекетіне өткізілетін ірі қара бастың бағасы базардағы нарықтан жоғары болып отырғанын жеткізді. Осылайша, тәуелсіз еліміздің тұрғындарының әл ауқаты мен тұрмыс деңгейі көтеріліп келетінін айтқан Ж.Түймебаев осы бағыттағы жұмыстарды жалғастыруды аудан әкіміне міндеттеді.