Наурыз мейрамын үздік тойлаған қалалар

Рейтинг

24.03.2017, 18:43

Қазақстандықтар үш күн бойы Наурыз мейрамын тойлап, 5 күндік демалысқа шықты. Мерекелік шаралар әр облыс орталығында, қалаларда, ауданда, ауылдарда мазмұнды, көрнекі әрі ауқымды деңгейде тойланды. saigez.kz ай сайын қала әкімдерінің тұрақты рейтингін жүргізіп жүргендіктен, республикамыздың түрлі қалаларындағы, әсіресе облыс орталықтарында өткен мерекелік шараларға шолу жасады.

Шымкент қаласы

Түркістанда басталған Наурыз Шымкентте де жалғасты. Шымкенттегі Наурыз мейрамы Түркістан қаласында өткен республикалық шараның тасасында қалған жоқ.

Миллионға жуық халқы бар шаһарда өткен мерекеге жиналған жұрттың санында есеп жоқ. Керемет көңіл күй мен басталған шараның шымылдығы ат спортымен өткен жарыспен түрілді. Мұнан соң «Шашу» хореографиялық композициясы орындалып, 60 домбырашы шеңбер жасап, күй тартты.

Наурыз айтыс ұйымдастырылып, 8 әже шашу шашып, 20 қыз құрметті қонақтар мен көрермендерге Наурыз көже таратты. Барша жұртшылықты көктемнің керемет мерекесімен құттықтаған Оңтүстік Қазақстан облысының әкімі Жансейіт Түймебаев оңтүстіктегі Наурыз мерекесінің кеше ғана киелі Түркістан қаласында бастау алғанына тоқталды.

«Жер-Ананың бусанып, күн мен түнді теңестірген жыл басы – Ұлыстың ұлы күні әз Наурыз мерекесі құтты болсын! Ежелден ата-бабаларымыз «Ұлыс оң болсын, ақ мол болсын!» деген ақжарма тілекпен айналасын ақжарқын шуаққа бөлеген. Бұл күнді көңілге шаттық ұялайтын мезгіл, жаңару айы деп санаған. Кеше ғана киелі Түркістан топырағында Наурыз мерекесі аясында «Түркістан – Түркі әлемінің мәдени астанасы» іс-шарасын өте жоғары деңгейде өткіздік. Осылайша Сіз бен біз тарихтың тамаша бір жаңа бетін жаздық», - деді Жансейіт Қансейітұлы.

Мұнан соң аймақ басшысы ел үшін еңбек еткен, тәуелсіздігімізді нығайтуға үлес қосқан елімізге танымал бір топ жерлесімізге «Оңтүстік Қазақстан облысының құрметті азаматы» атағын салтанатты түрде табыс етті. Олардың қатарында Қазақстан Республикасы Парламенті Сенатының депутаты Айтаханов Қуаныш, қазақ руханиятының жанашыры Өмірзақ Айтбаев, жазушы, драматург Дулат Исабеков, қоғам қайраткерлері Болат Жылқышиев, Оразкүл Асанғазы, Шалатай Мырзахметов сынды түрлі салада еңбек етіп жүрген 25 азамат бар. Айта кетейік, бүгінде облыс аумағында жүзден аса этнос өкілдері ынтымақ бірлікте тату-тәтті өміріп сүріп, бірлесе білек сыбанып еңбек етіп жүр. Олар наурыз мерекесінде салт-дәстүрін сақтап, әдеп-ғұрпын дәріптеп жатты.

Мереке барысында «Айгөлек», «Шамсинур», «Шаттық» «Тұмар», «Қазына», «Арулар» би ансамблдері бірлесіп «Достық» cютасын орындады. Мұнан соң сахна төріне Қазақстан эстрадасының жұлдызы Серік Ибрагимов шығып, жиналған жұртты билетсе, «Ринго» тобы концерт көркін қыздыра түсті. Оңтүстіктегі наурыз мерекесі «Абай», «Жеңіс» саябақтары мен «Әл-Фараби» алаңында жалғасын тапты.

Талдықорған қаласы

22 наурызда Талдықорған қаласының «Жастар» саябағында «Нұр себеле, Ұлыстың ұлы күні» атты мерекелік шара қаланың жүздеген тұрғындары мен қонақтарының басын қосты. Киіз үй түріндегі қалашықта түрлі халық дәстүрлерінің, қолданбалы өнер және «Шебер ауылы» қала қолөнершілерінің көрмелері, «Қазақстанда жасалған» ШОБ саласының және өнеркәсіптік кәсіпорындар жетістіктерінің көрмесі, «Наурыз бейнелері» балалар шығармашылық мектебінің тәрбиеленушілерінің көрнекілік жұмыстары және «Достық алаңы» Қазақстан халқы ассамблеясының ұлттық-мәдени орталықтарының қолөнер бұйымдарының көрмелері өткізілді.

Көкшетау қаласы

Облыс орталығында мереке «Наурыз сән – салтанат, ұлттық рух» атты театрландырылған қойылымнан бастау алды.

Бұдан өзге, «Экспо-2017» аясында әрі адамның техникалық және технологиялық жетістіктерін көрсету мақсатында робот-трансформерлер шоуы ұйымдастырылды. Сондай-ақ, көпшілікке танылып үлгерген «Домбра Party», «Қымыз фестивалi», «Бауырсақ Party» шаралары өткізілді.

Қызылорда қаласы

Қызылорданың орталық қала алаңында 30 киіз үй мен 6 шатырдан тұратын қалашық тұрғызылды, «Экспо-2017» көрме павильоны ұйымдастырылды, онда қонақтарға Астанада өтетін шараға билет сатып алу мүмкіндігі берілді.

Шебер әйелдер басты мерекелік асты әзірлеу өнерінен жарысқан «Наурыз көже» фестивальі өтті. Көрермендер, жаппай сауық-сайран қатысушылары жеңімпазды таңдады.

Тараз қаласы

«Достық» алаңында «Мәңгілік ел төріндегі – Наурыз» ұранымен Наурыз мейрамына орайластырылған шара өткізілді. Көрермендерге 500 адам қатысқан театрланған қойылым, Қазақстан эстрадасының жұлдыздары Жанболат пен Жазираның концерттік бағдарламасы, ТҮРКІСОЙ халықаралық ұйымының түркі халықтары мәдениеттері мен өнерлері ұжымдарының концерттік бағдарламасы ұсынылды.

Қарағанды қаласы

Қарағандыда Наурызға облыстық өлкетану музейінің қызметкерлері арнайы киіз үйлерде барлық қызығушылық танытушыларға экскурсия жүргізді. Мамандар қала тұрғындарына қазақ халқының әдет-ғұрыптары, дәстүрлері мен ата-бабалардың өмір сүру салты туралы айтып берді.

Орталық саябақтың сахнасында «Наурыз аңызы» мюзиклі көрсетілді. Театрланған қойылымға 600-ден астам адам атсалысты. Мюзиклде дүние жаратылысының барлық кезеңдері туралы, табиғат апаттарымен күрес, көктемгі жандану және жердің гүлденуі жайында айтылды. Көл жағасында ұлттық спорт түрлері мен ат және аласа жылқымен жарысу жарыстары өтті.

Атырау қаласы

Биыл қала билігі алғаш рет ең үздік киіз үй байқауын өткізді. Ол үшін алдымен арнайы комиссия құрды, оның құрамына танымал мәдениет қайраткерлері, тарихшылар, этномәдени бірлестіктердің жетекшілері кірді.

Байқау 20 наурызда бастау алды. Комиссия киіз үйлердің тек сыртқы бейнесіне қарап қоймай, сонымен қоса ішіндегі жабдықтарына – тұрмыстың қандай ұлттық элементтері қолданылғанына мән берді. Бірінші кезекте, комиссия киіз үйдің ағаш не құрастырмалы-металл құрылымына баса назар аударды.

Киіз үйлерді тұрғызуға қала колледждерінің білім алушылары қатысқан кезде, ақсақалдар үдерісті бақылап, жетекшілік етуден өзге, жастарға байырғы қазақ тұрағының шығу тарихы, оның түрлері мен құрамдас бөліктері туралы, сонымен қатар киіз үйді жинау, бөлшектеу, орналастыру және өзге жерге көшіру жұмыстары туралы айтып берді.

Павлодар қаласы

Мыңдаған павлодарлықтар Наурыз мейрамына орай қаланың орталық алаңына жиналды. Мереке қаланың орталық алаңында басты кейіпкері Қыдыр ата болған театрланған қойылымнан бастау алды.

Алаңда әрбір қалаушы қазақ халқының мәдениетімен және тұрмысымен таныса алатын киіз үйлер орнатылды. Олардың ішінде халық қолөнершілерінің ағаштан, металлдан және былғарыдан жасалған бұйымдары ұсынылды.

Өскемен мен Семей қалалары

Өскеменге Наурыз мейрамын тойлау күндері Мұрат Мұтұрғановтың цирк шоуы мен Қырғызстаннан келген Рахмановтар әулетінің даршылары келіп, өнер көрсетті.

Семейде басты театрланған қойылым Абай атындағы театр ғимаратына жетелейтін кең сатыларда ұсынылды. Үлкен көркемдік шоуға бірнеше жүздеген мектеп оқушылары және Семейдің ондаған шығармашылық ұжымдары қатысты.

Ақтөбе қаласы

Наурыз мейрамына орай Ақтөбе облысында 1000-нан астам шара ұйымдастырылды. Наурызға орайластырылған халық сайрандарына он мыңдаған адам қатысты. Ең ауқымды мерекелік шара Ақтөбе қаласында өтті. Облыс орталығында ұйымдастырылған мерекелік салтанаттар 20 мыңнан астам адамның басын қосты.

Ақтөбеде ұлттық нақыштағы 75 киіз үй тұрғызылды. 30 киіз үйден тұратын ең үлкен киіз үй ауылын кәсіпорындар мен мекеме орындары Тұңғыш Президент атындағы саябақта ұйымдастырды. Қонақтарға арнап 5 тонна бауырсақ, 7 мың литр наурыз көже пісірілді.

Ақтау қаласы

Ақтау қаласының жағасына 25 ақ киіз үй тұрғызылды, олардың әрқайсысы облыс орталығының тұрғындары мен қонақтарына ас-шай әзірледі. Арнайы мереке қонақтары үшін шамамен 2000 литр шұбат, 5 мыңнан астам тонна бауырсақ, 7 тонна палау және 3 мың литр наурыз көже пісірілді.

Петропавл қаласы

Петропавл қаласында Наурыз мейрамын тойлаудың негізгі орны 21 наурызда киіз үй қалашығы тұрғызылған, М. Жұмабаев атындағы көше болды. Этномәдени бірлестіктердің қатысуымен Достық үйінің алдына «Достық дастарқаны» орналастырылды.

Мереке барысында халықтың қатысуымен ойын-сауық байқау бағдарламалары, «Достық хормен жүру» флеш-моб музыкалық ойыны өткізілді. Мереке қонақтарының қатысуымен келіндер арасында қазақ халқының дәстүрлері мен әдет-ғұрыптарын білуге байланысты байқау өткізілді.

Бірінші күннің соңына қарай «Көктем әндері» атты қаланың аға буынына арналған мерекелік бағдарлама ұйымдастырылды.

22 наурызда Орталық алаңда мереке қонақтарына қала домбырашылары «Балбырауын», «Адай» күйлерін жаппай орындап, «Қара жорға» биіне флеш-моб ұйымдастырды.

Бұдан өзге, өңір әкімі Қ. Ақсақаловтың бастамасымен алғаш рет көппәтерлі үйлердің 30-дан астам ауласында мерекелік шаралар ұйымдастырылды. Қайырымдылық акциялары аясында балаларға «Нептун» аквапаркінде тегін демалу, «Киндер ленд», «Мадагаскар», «Аттракциондар әлемі» ЖШС-нің аттракциондарына бару мүмкіндігі берілді.

Орал қаласы

Оралда «Мейірімді көктем» жобасы аясында қоғамдық ұйымдарға, жастарға, ұжымдарға қолдау көрсеткен көптеген қайырымдылық акциялары өткізілді. Дегенмен, ең ауқымды шара 22 наурызда өткізілді. Көптен күткен Наурыз мейрамы Орал қаласында биыл жаңа Тәуелсіздік алаңында атап өтілді. Мерекеге орай оралдықтар 300 шырша мен қайың көшетін отырғызды.

Қостанай қаласы

Қостанайда ашық аспан астында «Палау әлемі» және «Бауырсақ – Қазақстанның аспаздық бренді» байқаулары өткізілді. Бірнеше сағат бұрын шамамен тонна ұлттық тағамдар даярланды.