Еңбек түбі - береке

Жамбыл облысында 10- жылда өз ауылының әлеуметтік жағдайын көтеруге 5- млрд. теңге қаражат салған еңбек адамы тұрады. Ол Тұрар Рысқұлов ауданы, Жарлысу ауылындағы «Шәушен» шаруа қожалығының жетекшісі Сайрамбай Дөненбаев. 1996 жылдан бастап, қой және жылқы малын өсірумен айналысатын ұжым биыл қойды 60- отардан, жылқы санын 2200 бастан асырды. Негізгі мақсат, ауыл тұрғындарын жұмыспен қамтып, ет және сүт бағытындағы жұмыстарды жандандыру.

Еңбек адамы Сайрамбай Дөненбаев 1996-жылы өз туыстарымен бірлесіп, Тұрар Рысқұлов ауданының Жарлысу ауылында «Шәушен» шаруақожалығын құрды. Ол мал шаруашылығын дамыту туралы алдына мақсат қойып, ұзақ жылдар тынымсыз жұмыс істеді. Алайда, адал еңбек пен төккен тер зая кетпейтіндігі анық. Ол бүгінде өзіне де, өзгеге де пайда келтіріп жүрген жан. Себебі, аудан экономикасын көтеруге жыл сайын қыруар қаржы салық төлейді. Жарлысу ауылының басым көпшілігін жұмыспен қамтып отыр. Мәселен: елді мекенде қазір 200- ден астам үй болса, әр үйде кемінде бір-екі адамнан осы шаруашылықта еңбек етеді.

«ШӘУШЕН» ШҚ жетекшісі Сайрамбай Дөненбаевтың өзі былай дейді:

Қазақтың негізгі ата кәсібі –қой шаруашылығын елге таныту менің түпкі мақсатым болды. Бізде «Мал өсірсең – қой өсір, пайдасы оның көл-көсір» деген мақал бар. Осындағы нысандардың барлығы қой өсіріп, соның пайдасынан орнатылған. Негізінен қой шаруашылығымен мықтап айналысқаныма 4- жылдың жүзі болды. Бұрындары егін өсірумен де айналыстым аздап. 2002 жылдан асыл тұқымды қой шаруашылығы болды. 2003-тен жылқы шаруашылығы қосылды. Қазір жылқы да асыл тұқымды.

Ия, ердің атын еңбек шығарады деген. Жеке кәсіпкер бүгінде өз ауылының құрметті азаматы. Ол тұратын Жарлысу ауылының тұрғындары соңғы жылдары мемлекет есебінен салынған қандай да бір мекемені біле бермейді. Себебі, Сайрамбай Дөненбаев соңғы 10- жылда өз ауылын көтеруге 5- млрд. теңге қаражат салыпты. Ол ақшаға 500- орындық мешіт, балалар интернаты, қымызбен емдеу орталығы, асхана, медресе, саябақ пен жаңа балабақша салып берген. Әрине, еңбек адамы осы істің барлығы ел игілігі үшін дейді. Келер жылға тағы да жоспарлар бар».

Шаруа қожалығының жетекшісі, келесі жылғы жоспары туралы: «Біз еңбек адамымыз. Еңбек еттік құрадық. Алла Тағала берді. Енді оны қайда апарамыз, ел игілігіне жұмсамаған да?... Алдағы 2019 жылы балабақша салсақ, сонымен қатар Елбасымыз жариялаған Жастар жылының құрметіне осы ауылға спорт кешенін салуды жоспарлап отырмыз» деді.

«Шәушен» шаруа қожалығы 2000- жылдардың басында ақ асыл тұқымды мал шаруашылығы статусын алған. Бүгінде қой етін Меркі ет комбинатына өткерсе, Астана қаласы маңынан үлкен мал бордақылау кешенін салып жылқы етін сонда тасмалдайды. Сонымен қатар, Тараз қаласын қымызбен де қамтамасыз етіп отыр. Шаруашылық өз ауылынан малшылар үшін екі отбасылы 10- үй салған. Осы уақытқа дейін Сайрамбай Дөненбаевтың қолынан малшылар 37- тұрғын-үй кілттерін алыпты. Солардың бірі Жандос Атжанов.

Ол осыдан 15- жыл бұрын осы шаруашылыққа қойшы болып келіп, басқарушылық қызметке дейін көтерілді.

Әрине, бүтіндей бір ауыл емес, бүкіл аудан, облыс, тіпті, республикаға танымал болып отырған «Шәушен» шаруа қожалығының бүгінгі жұмысы шын мәнісінде көпке үлгі деп айтуға болады. Мал басы санын арттыру арқылы елдің әлеуметтік жағдайын да жақсартуға көңіл бөліп отырған ұжымның алда алар асуы да көп деп білеміз.