Сенатордың Гүлмира Кәрімованың қазасының себебі айтылды
Жедел жәрдем келгенде оның тамыры соқпаған және тыныс алмаған
Жаңадан сайланған Сенат депутаты Гүлмира Кәрімованың өліміне анафилаксиялық шок емес, миокард инфарктісі себеп болған. Бұл туралы Астана қоғамдық денсаулық сақтау басқармасынан хабарланды.
Сот-медициналық сараптаманың алдын ала қорытындысы бойынша науқастың өліміне жедел миокард инфарктісі тікелей себеп болған. Анафилаксиялық шок алу туралы ақпарат расталмаған.
Сондай-ақ басқармадағылар сенатор өзін жайсыз сезінгенде жедел жәрдемнің дер кезінде, яғни 5 минутта жеткенін атап өтті.
«Бригада келген кезде, өкінішке қарай, науқас қимыл-қозғалыссыз жатқан. Есін білмеген, тамыры соқпаған және тыныс алмаған. Осыған қарамастан, реанимациялық шаралар жүргізілді, нәтиже болмады», - деді басқарма мамандары.
Еске салсақ, Гүлмира Кәрімова биыл 14 қаңтарда өткен сайлауда Солтүстік Қазақстан облысынан Сенат депутаты болып сайланған еді.
Бұған дейін ол Оқу-ағарту министрлігінде мектепке дейінгі және орта білім комитетін басқарды. Солтүстік Қазақстанда облысында білім саласында түрлі жауапты қызмет атқарған.