Қазақстанда пияз бағасы бір жылда 105%-ға қымбаттады
Макарон өнімдері де айтарлықтай қымбаттаған
2023 жылғы ақпанда жылдық мәнде инфляция деңгейі 21,3% құрады. Бұл туралы Ұлттық статистика бюросынан хабарланды.
Сонымен қатар жыл ішінде азық-түлік тауарларының бағасы 26,2%, азық-түлікке жатпайтын тауарлар 20,5%, ақылы қызметтер 15% өсті.
2022 жылғы ақпанмен салыстырғанда пияз – 105%, кір сабын – 90,3%, кеңсе тауарлары – 71,8%, қияр – 56,8%, ағартқыштар мен балалар сабыны – әрқайсысы 56,3%-дан, қант – 55%, консервіленген сүт – 49,1%, күріш – 44,9%, макарон өнімдері – 41,1%, ұн 40,2% қымбаттаған.
Жылдық мәнде, керісінше, ақбас қырыққабат 30,1%-ға арзандады.
Бұған дейін Ауыл шаруашылығы министрі Ербол Қарашөкеев Қазақстанда пияз қоры жеткілікті екенін айтып, халықты сабырға шақырды. Министрдің айтуынша, былтыр 1,2 млн тонна пияз жиналды. Оның 1 млн тоннасы Жамбыл облысында өндірілген.