Жамбыл облысында Қазақстанда жоқ «Моцарелла» өнімі өндірілуде
Елбасы Жолдауын қолдау, әрі мемлекеттік және үкіметтік бағдарламалардың орындалу барысын ақпараттық сүйемелдеу мақсатында БАҚ өкілдерінің қатысуымен және орталық коммуникациялар қызметінің ұйымдастыруымен Жуалы ауданында баспасөз туры өтті.
БАҚ қызметкерлері алғаш бас сұққан кәсіпкерлік ұйым Қазақстанда жоқ «Моцарелла» өндіруді қолға алған екен. Жамбыл облысы Жуалы ауданындағы жеке кәсіпкер «Мешелова З.Е.» бүкіл Қазақстанда өндірілмейтін «Моцарелла» атты ірімшік түрін шығаруды қолға алды. Сатылымға шыққанына он күннен енді асса да аталған өнім сұранысқа ие тауардың түріне айналып үлгерген.
Жеке кәсіпкер Орынбасар Мешелов моцарелланың құрамын өздері құрастырғанын алға тартады. Оның отбасылық кәсібі 2011 жылы өз жұмысын бастаған. Алғашқыда мал өсірумен шұғылданған Мешеловтар отбасы бүгінде сол малдан алған шикізат өнімдерін игеріп, олардан май, чечил, ірімшік сынды өнімдерді шығаруды қолға алған.
«Моцарелланы шығарғанымызға он шақты ғана күн болды. Құрамын тауып, оны әзірлеуге он күндей уақыт жұмсадық. Бірақ нәтижесі жақсы болды. Менің келіндерім осында бірі технолог, бірі инженер болып жұмыс жасайды, ал өзім химикпін. Осы себепті де моцарелла өнімінің құрамын тауып, оны дайындау аса қиын болмады, дегенмен біраз уақыт жұмсадық. Қазақстанда алғаш болып қолға алғандықтан аталған өнім сұранысқа ие, әрі шет елден келетін моцарелладан бағасы да арзан», - дейді жеке кәсіпкер Орынбасар Мешелов.