«Қайырымдылық – қайырлы іс» форумы өтті
Шымкент қаласында «Қайырымдылық – қайырлы іс» форумы өтті. Облыстық Қазақстан халқы ассамблеясының ұйымдастыруымен өткен шара 1 желтоқсан – ҚР Тұңғыш Президенті күніне орайластырылған.
Форумға облыс басшылығы, облыстық мәслихаттың депутаттары, кәсіпкерлер, этно-мәдени бірлестіктердің төрағалары мен облыстық ассамблея жанындағы құрылымдар жетекшілері және өңір тұрғындары қатысты.
Форумның басты мақсаты – ауыр дертке шалдыққан балғындарға көмектесу. 2016 жылы ассамблеяның ұйытқы болуымен түрлі қайырымдылық іс-шара нәтижесінде 27 мыңнан астам адамға 85 миллион теңге көмек көрсетілген.
Ал биыл қаңтар айынан бастап қыркүйек айына дейін өңірімізде 400-ге жуық қайырымдылық шарадан 30 млн теңгеден асатын көмек көрсетілген. Бұл күні түскен қаржы ауыр дертке шалдыққан 5 бүлдіршінді емдеуге жұмсалмақ.
Облыстық мәслихаттың депутаты Әбілқасым Досболов өзінің жеке қаржысынан 1 миллион теңге салды.