Бүгін Оңтүстік Қазақстан облысы әкімінің өкімімен Мақсат Шамансұрұлы Исаев Созақ ауданының әкімі болып тағайындалды. Бұл туралы ОҚО әкімінің баспасөз қызметі хабарлады. Аудан активіне ауданның жаңа басшысын облыс әкімі А.Мырзахметов таныстырды. М. Исаев 1970 жылы туылған, білімі жоғары, мамандығы бойынша экономист. Еңбек жолын 1995 жылы Шолаққорған ауылы «Алмас» шағын жеке кәсіпорында есепші болып бастаған. 1996-2012 жылдары Оңтүстік Қазақстан облысы Созақ ауданы әкімшілігінің экономика бөлімінде кіші және орта бизнесті қолдау және дамыту жөніндегі бас маманы, Созақ ауданы әкімі аппараты аумақты дамыту және кадрлық жұмыс жөніндегі бөлім меңгерушісі, Созақ ауданы әкімі аппаратының басшысы, Оңтүстік Қазақстан облысы әкімінің бас инспекторы, Шымкент қаласы Еңбекші ауданы, Созақ ауданы әкімдерінің орынбасары, «Қыземшек-Демеу» ЖШС директоры қызметтерін атқарған. 2012 жылдың сәуір айынан бастап бүгінгі күнге дейін Созақ аудандық мәслихатының хатшысы болып еңбек етіп келген. Созақ ауданына соңғы үш жыл жетекшілік жасаған Аманғали Аймұрзаевқа құрмет көрсетіліп, зейнеттік демалысқа шығарып салды. Аудан активімен өткен жиында жаңа аудан басшысының қызметіне сәттілік тілеген облыс әкімі мемлекеттік саясатты жүзеге асыру үшін тыңғылықты жұмыс жасауды міндеттеді.