Қазақстан экспорттаушы 50 ірі елдің қатарында

Бүгін Астанада 100 нақты қадам, нақтырақ «3-4 қазақстандық экспорттық брендті құру мен жүзеге асыру» тақырыбына арналған брифинг өтті.  

Оған ҚР Ауыл шаруашылығы министрлігінің «Аналитикалық орталық» ЖШС бас директоры Қайрат Сәдуақасов, Қазақстан Республикасы Инвестициялар және даму министрлігінің Индустриялық даму және өнеркәсіптік қауіпсіздік комитеті төрағасының орынбасары Тимур Нұрашев, «Kaznext invest» АҚ-ның экспортты жетілдіру департаментінің директоры Айсұлу Сұлтанмұратова қатысты.

Баспасөз конференция барысында Тимур Нұрашев Қазақстан әлем экономикасының ажырамас бір бөлігі және  тұрақты  50 ірі экспорттаушы елдердің қатарына кіретінін атап өтті.

Әлем Қазақстанды біріншіден уран, ұн, бидай жеткізуші ретінде таниды.  Шикі мұнай жеткізуші ретінде ірі ондыққа кіреді. Әлемнің 118 еліне барлығы 970 тауар түрін экспорттаймыз. Жылына шамамен 200 мыңнан аса экспорттық операцияларды жүзеге асырамыз. Бүгінгі таңда 1800 экспорттаушы жұмыс істейді. Олардың 20%-ы тұрақты 1 млн. доллардан аса экспортқа ие. Экспорттың сапалық құрылымы жақсарды. Бүгін шикізат емес өнімнің үлесі 30% - ға өсті. 5 жыл бұрын бұл үлес 24% болатын.

Агроөнеркәсіп кешенінде ҚР Ауыл шаруашылығымен бірге  «Qazaq Organic Food», «Халал», «Ет бренді» сияқты брендтер әзірленді. Бұл үш бренд те стратегиялық маңызға ие және белгілі бір нарыққа бағытталған.

«Бұл жоба отандық азық-түлік тауарларын экспортқа шығаруға қосымша серпін береді және Қазақстанды басқа елдер үшін табиғи органикалық тауар өндіруші ел ретінде танытуға мүмкіндік туғызады»,- деді Тимур Нұрашев Орталық коммуникациялар қызметінде өткен баспасөз конференциясында.