Түркіменстан президентінің жылқы туралы үш кітабы қазақша аударылды
Түркіменстан президенті Гурбангулы Бердімұхамедтің Қазақстандағы екі күндік ресми сапарын аяқталды. Астанада Қазақстан президенті Нұрсұлтан Назарбаев пен Түркіменстан президенті Гурбангулы Бердімұхамедов стратегиялық әріптестік туралы келісімге қол қойды. Назарбаевтың сөзінше, бекітілген құжат екі елдің арасындағы шекара мәселелерін шешуге сеп болмақшы.
Түркіменстан президенті сапарының екінші күнінде Астанадағы Ұлттық музейде Түркіменстан президенті Гурбангулы Бердімұхамедовтың қазақ тіліне аударылған үш кітабының тұсаукесері өтті.
Бердімұхамедовтың үш кітабы қазақ тілінде "Ақалтеке тұлпары - мақтанышымыз бен абыройымыз", "Тұлпардың шапшаң шабысы" және "Жас тұлпарлардың самғауы" деп аталады.
Тұсаукесер рәсіміне Гурбангулы Бердімұхамедовтың өзі қатысты. Үш кітап Қазақстан ұлттық олимпиада комитетінің президенті Тимур Құлыбаевтың бастамасымен аударылған. Әр кітап мың данамен басылып шықты.