Астанадағы жаңа терминал алғашқы рейсін қабылдады

Бүгін Астана халықаралық әуежайының жаңа терминалы «Аэрофлот» әуе компаниясының Мәскеу- Астана рейсімен келген алғашқы жолаушыларын қабылдады. Бұл күні жаңа терминал Airbus-320 ұшағымен Мәскеуге ұшқан жолаушыларға қызмет көрсетті.

Сондай-ақ, бүгін халықаралық бағдарларға Ташкентке («Өзбек әуежолы») және Франкфуртке («Lufthansa») ұшақтар жіберу жоспарланып отыр.

«Барлығы Астана әуежайының жаңа терминалының ашылуын күтті. Міне, енді біз халықаралық әуежай арқылы жолаушыларды күтіп алып, шығарып салуды бастадық»,- дейді Астана халықаралық әуежайының Басқарма төрағасы Паоло Ричиотти.

П. Ричиоттидің айтуынша, «команда қысқа мерзімде жобаны табысты жүзеге асырды».

Оның айтуынша, «Астана әуежайын дамыту жобасы әлемнің ірі қалаларымен жалғастыратын басты байланыс желісі – Орта Азия өңірінің аймақтық хабы» болып табылады.

Астанаға келген жолаушылар қатарында Берлиннен келген Шаповаловтар отбасы Мәскеу арқылы әуежайдан түсті. Ол құжаттар тексеру мен багаждар мен қол жүктерін қабылдау жедел атқарылғандығына ризашылығын білдірді.

Жолаушы Регина Шевалье жаңа терминалдың қызмет көрсету сапасына таң қалғандығын жасырған жоқ.

«Маған жаңа терминал өте ұнады. Халықаралық стандартқа сай келеді», - дейді Р. Шевалье.

Атап өтерлігі, Астана халықаралық әуежайының жаңа терминалы Мемлекет басшысының қатысуымен биылғы жылы 31 мамырда ашылды.

Әуежайдың баспасөз қызметі мәлім еткендей, заманауи үлгідегі жолаушылар терминалының құрылысы 2014 жылғы қарашада басталып, 2017 жылы мамырда аяқталды. Жаңа терминалдың аумағы 47000 шаршы метр, жылына 8,2 миллион жолаушыны өткізеді. Жаңа терминал ескі әуежайдың өткізу қабілетін 2,5 есеге арттырды.