Сомали сауда қатынасын ныңайтуға ниетті
Шілденің алғашқы күні ЭКСПО-2017 көрмесі қалашығында Сомали Федеративтік Республикасы ұлттық күнін тойлады. Астанадағы жиында жасыл энергетиканы қолдайтындықтарын білдірген сомалиліктер – өте көңілді халық. Ән мен биді жандары сүйеді екен. Ұлттық мерекелеріне салт-дәстүрлерінен танытатын бағдарлама дайындап әкелген. 
Мемлекеттің танымал әншісі Ник Косова шарада Сомали дәстүрлі әуендерінің желісіне құрылған афро-поп әндерін орындады. Олардың ЭКСПО-дағы төл мейрамын дәл 1 шілдеге орайластыруының өзіндік мәні бар екен. 1960 жылдың 1 шілдесінде Сомали-ленд пен Сомали бірігіп, Сомали мемлекетін құрған. Қазір федеративтік республика. Сонау Шығыс Африкадан келген сомалиліктердің айтуынша, елдерінде жиі құрғақшылық болады. Сондықтан жасыл энергетиканы, осы салаға қатысты технологияны меңгеру жолдарын қарастыруда. Олардың басты мақсаты – баламалы энергияны қолдануда көш бастап тұрған мемлекеттердің озық жобаларымен танысып, әріптестік орнату. Мерекенің ресми бөлімінде Ақпарат және коммуникациялар министрлігінің жауапты хатшысы Жанат Қожахметов сөз сөйлеп, қонақтарға деген жылы лебізін білдірді. Өз кезегінде Сомали Премьер-министрінің экономикалық мәселелер жөніндегі аға кеңесшісі Абдуллахи Юсуф Мохамед екі мемлекеттің де Ислам ынтымақтастығы ұйымына мүше және дипломатиялық қарым-қатынаста екенін айтты. «Осы мүмкіндікті пайдалана отырып, Қазақстанмен сауда қарым-қатынасын нығайтуға ниеттіміз. Сол арқылы жасыл технология, мұнай-газ және тау-кен барлау жұмыстары салаларындағы ынтымақтастықтың негізін қалаймыз», деді ол. Абдуллахи Юсуфтың айтуынша, көрменің «Болашақ энергиясы» тақырыбы қазба отынға тәуелділікті барынша азайтуды зерттейтін өте маңызды жоба. Сомали шара аясында мәдени және жаңартылатын энергия бастамаларын ұсынады, идеяларымен бөліседі, алмасады. Сомали республикасының өкілі Лушку Валушику Африка құрлығынан ЭКСПО-2017 көрмесіне жиырмаға жуық мемлекет қатысып жатқанын жеткізді. Барлығы да жаңартылған энергияны табыстың көзі санайды екен. «Сомалидің де күн энергиясына қатысты жобалары бар. Оны әлі де толықтыра түссек дейміз. Бізге бастысы тәжірибе жинақтау керек. Ал Қазақстан маған ұнады. Көрменің дәл осылай жоғары деңгейде өтіп жатқандығы Президент Нұрсұлтан Назарбаевтың арқасы дер едім», деп ағынан жарылды ол.
Ақпарат көзі: "Егемен Қазақстан"