Қазақстаннан Түркияға түрік тілін еркін меңгерген дәрігерлер жіберілді
Олардың арасында терапевт, ортопед, нейрохирург мамандар бар
Түркияның жер сілкінісі болған қалаларына түрік тілін еркін меңгерген қазақстандық тоғыз дәрігер барады. Бұл туралы Түркістан облысы әкімінің баспасөз қызметі хабарлады.
«Қасым-Жомарт Тоқаев үкіметке Түркияның оңтүстік-шығысында болған жойқын жер сілкінісінің салдарын еңсеруде шұғыл көмек көрсетуді тапсырды. Осы тапсырмаға сәйкес еліміз бойынша Түркияға медициналық көмек көрсету үшін дәрігерлер бригадасын құру тобының құрамына Түркістан облысынан 9 дәрігер жіберілді», - делінген ақпаратта.
Тізімге алынған Түркістан облыстық клиникалық аурухананың дәрігерлерінің қатарында терапевт, ортопед, нейрохирург, ангиохирург, проктолог, хирург, невролог мамандары бар.
Олардың барлығы түрік тілін еркін меңгерген.