Тоқаев Рамазан айының басталуымен құттықтады
Президент ата-бабамыз Рамазанды он екі айдың сұлтаны деп ардақтағанын жазды
Қасым-Жомарт Тоқаев қасиетті Рамазан айының басталуымен құттықтады.
«Бұл – күллі мұсылман қауымы үшін мән-маңызы айрықша мезгіл. Адамзатты рухани тазаруға және жан-жақты кемелденуге бастайтын осы айда төзімділік, жанашырлық, имандылық сияқты құндылықтар кеңінен дәріптеледі», - деді ол.
Президент ата-бабамыз Рамазанды он екі айдың сұлтаны деп ардақтағанын жазды. Ораза ұстаған жамағатқа ауызашар беріп, бір-біріне ерекше құрмет көрсеткенін айтты.
«Салт-дәстүрімізбен сабақтас асыл дініміз ғасырлар бойы Ұлы далада елдің бірлігін және қоғамның тыныштығын сақтау жолында маңызды рөл атқарып келеді.Мейірімділік айында халқымыз игі істерін еселеп, сауапқа кенеле берсін! Ораза қабыл болсын», - деді ол.