Маска тақпағаны үшін жеке тұлғаға салынатын айыппұл көлемі 30 есе азаюы мүмкін

Жаңалықтар
19.08.2020, 12:43

Бұл туралы Қазақстанның бизнес-омбудсмені хабарлады

Маска тақпағаны үшін жеке тұлғаға салынатын айыппұл көлемі 30 есе азаюы мүмкін
Фото: tengrinews.kz

Әкімшілік құқықбұзушылық туралы Кодекске өзгерту мен толықтыру енгізу жөніндегі заң жобасының тұжырымдамасы қарастырылып жатыр, деп хабарлайды sputniknews.kz.

Қазақстанда бетперде тағу режимін бұзғаны үшін салынатын айыппұл мөлшерін 83 мың теңгеден 2 778 теңгеге дейін азайту ұсынылып отыр. Бұл туралы кәсіпкерлерінің құқығын қорғау жөніндегі уәкіл Рустам Жүрсінов хабарлады.

«Қазіргі кезде мемлекеттік органдар "Қазақстан Республикасының Әкімшілік құқық бұзушылық туралы кодекске өзгерістер мен толықтырулар енгізу туралы" заң жобасының тұжырымдамасын қарастырып жатыр. Соның аясында жеке тұлғалар үшін бептерде тақпағаны үшін салынатын айыппұлды 30 айлық есептік көрсеткіштен 1 АЕК-ке (2 778 теңге) дейін төмендету ұсынылып отыр. Біз осы жұмысқа белсенді атсалысудамыз», - деп жазды Жүрсінов әлеуметтік желідегі парақшасында.

Бизнес-омбудсмен кәсіпкерлік нысандарда бетпердені тақпауға қатысты салынатын айыппұл мәселесіне де тоқталды. Оның айтуынша, кәсіпкер өз тарапынан барлық санитарлық норманы сақтап, бетперде мен қолғаптың қажетті көлемін әзірлеп қойса, қызметкерлері мен тұтынушылардың талапты бұзғаны үшін жауап бермеуі керек. Айыппұл бетперде тақпаған адамға ғана салынуы шарт.

Денсаулық сақтау министрлігінің санитарлық-эпидимиологиялық қызметі де мұны құптап отыр. Жүрсінов өзіне ресми жауап келгенін айтты. Оған сәйкес, кәсіпкерлік нысанда бетперде тақпаған қызметкер немесе клиент анықталса, әрбір тәртіп бұзушылық жеке-дара қарастырылады. Ал айыппұл талапты бұзған адамға салынатын болады.

Сұхбат

PhotoRoom