Сапарбаев «Гарант 24» ломбардына алданғандардың мүддесін қорғаушылармен кездесті

Аймақ
25.08.2020, 14:22

Өтініш берушілер алаяқтардың лайықты жазасын алатынына және ақшасын қайтарып алатынына күмәнданады

Сапарбаев «Гарант 24» ломбардына алданғандардың мүддесін қорғаушылармен кездесті
фото: zhambyl.gov.kz

Жамбыл облысының әкімі Бердібек Сапарбаевтың қабылдауында жетекшілері алаяқтық жасады деп айыпталған «Выгодный займ» және «Гарант 24 Ломбард» несие компаниялары салымшыларының мүддесін қорғап жүрген Тараз қаласының тұрғындары Нұргүл Шалова, Бердібек Авхинбаев және Саида Елубекова болды.

Бүкіл Қазақстан бойынша жүздеген адам қаржы пирамидасының кепіліне алынғаны белгілі. Жарнамаға сеніп, адамдар күмәнді компанияларға қомақты ақша салған. Сонымен қатар, салымшылар компаниялардың лицензиясыз заңсыз жұмысына алаңдаушылық танытпаған. Нәтижесінде тез және оңай жолмен байығысы келгендер «қақпанға» түсіп, салған қаржысын қайтара алмауда. Салымшылардың көпшілігінде банктерде несиелері бар десек, оларды уақтылы төлеу керектігі белгілі.

«Сіздердің мәселелеріңізді жақсы білеміз. Бұл іс бойынша тергеу әлі жалғасуда. Мұнан кейін сот процесі өтеді. Өз кезегімізде біз де сіздердің мәселелеріңізді заң аясында оңынан шешілуіне қол ұшын созатын боламыз», - деді облыс әкімі.

Өтініш берушілер алаяқтардың лайықты жазасын алатынына және ақшасын қайтарып алатынына күмәнданады. Сондай-ақ олар несие бойынша жеңілдік алуға көмек сұрады.

«Кінәлілер заңға сәйкес жауап береді. Бұл компанияларға қатысты қылмыстық іс мұқият зерттеледі болады және тергеудің объективті түрде өтетіне күмән жоқ. Қазір ондай заман емес. Сіздердің қазіргі несиелер бойынша төлемдеріңізге келетін болсақ, менің тиісті орынбасарым осы мәселе бойынша жұмыс жасайды. Біз мүмкіндігінше көмектесуге тырысамыз», - деп сендірді ол.

Сұхбат

PhotoRoom