Бүгін Сенаттың жалпы отырысында «1994 жылғы 15 сәуірдегі Дүниежүзілік сауда ұйымын құру туралы Марракеш келісіміне Қазақстан Республикасының қосылуы туралы хаттаманы ратификациялау туралы» ҚР Заңын қабылдады деп жазады Қазақпарат.
Айта кетейік, биылғы жылдың маусым айында Қазақстанның көп жылдар бойы Дүниежүзілік сауда ұйымына кіру туралы жүргізген келіссөздері аяқталған болатын. Ал 27 шілдеде ДСҰ-ға кіру туралы хаттамаға Қазақстан Президенті Н. Назарбаев Женева қаласында қол қойды. Осыған орай, еліміздің ДСҰ-ға енуі үшін ішкі мемлекеттік рәсімдер жүзеге асуы керек, соның ішінде Парламент аталған хаттаманы ратификациялауы тиіс.
ДСҰ-ға мүше болу Қазақстанның көпжақты келісімдеріне қатысу арқылы стратегиялық сауда-экономикалық мүдделерін іске асыру жөніндегі қосымша мүмкіндіктерді іске асыруға мүмкіндік береді. Сонымен қатар, еліміз ДСҰ-ға мүше басқа елдердің нарығында осы елдердің ішінде тауарларды тасымалдау кезінде қолданылатын сондай көлік тарифтері бойынша тауарларды экспорттауға мүмкіндік береді. ДСҰ-ға Қазақстанның кіруі бірлескен кәсіпорындар құру, бірлескен зерттеулер жүргізу, зияткерлік меншік объектілерімен алмасу, экономиканың түрлі салаларына жаңа технологиялар мен инвестицияларды тарту үшін кең мүмкіндіктер көздейді.
«Қазақстанның ДСҰ-ға кіру бойынша келіссөздері негізгі төрт бағытта жүзеге асты. Бірінші - көпжақты ауыл шаруашылық саласына мемлекет тарапынан берілетін субсидияның көлемі туралы келіссөздер. Бұл ДСҰ-ның 55 мүше-мемлекеттерімен арада жүргізілді. Екінші бағыт - көпжақты Қазақстанның сауда-экономикалық саясатының ДСҰ шарттарына сәйкестігін анықтайтын келіссөздер. Үшінші бағыт - Қазақстанның қызмет нарығында шетел компанияларының жұмыс жасау шарттары туралы келіссөздер. Бұл ДСҰ шеңберіндегі 15 мемлекетпен жүргізілді. Төртінші бағыт - Қазақстанның тауарлар нарығына импортталатын кедендік баждардың ең жоғары мөлшері туралы келіссөз, бұл ДСҰ-ның мүшесі болып табылатын 30 мемлекетпен жүргізілді», - деді Экономикалық интеграция істері министрі Жанар Айтжанова.
Тұтастай алғанда ДСҰ мүшелігі елімізге көпжақты сауда келіссөздеріне қатыса отырып, сауда-экономикалық стратегияларын жүзеге асыруға қосымша мүмкіндіктерді пайдалануға жол ашатын болады.
Парламент қабылдаған заң Мемлекет басшысының қол қоюына жолданады. Осы хаттама күшіне енген күннен бастап Қазақстан Республикасы ДСҰ-ға мүше болады.