Шымкент: Санитарлық нормаларды сақтамаған базар әкімшіліктері жауапкершілікке тартылды

Аймақ
04.09.2020, 15:01

Базар әкімдігі күніне екі рет залалсыздандыру жұмыстарын атқаруда

Шымкент: Санитарлық нормаларды сақтамаған базар әкімшіліктері жауапкершілікке тартылды
Фото: Береке Сейітжаппар

Шымкент қаласының Абай ауданында карантиндік талаптарды сақтамаған төрт ірі базар әкімшілігі жауапкершілікке тартылған. Жалпы аудан аумағында 13 базар орналасқан. Бүгінге дейін сақтық шараларына немқұрайлы қараған кәсіпкерлерге 11 млн теңге айыппұл салынды.

Абай ауданының әкімі Бұқарбай Парманов «Самал» базарында санитарлық нормалардың сақталуы бойынша өткен баспасөз брифингінде осылай деп мәлімдеді.

– Аудан аумағында әкімшілік мамандары, құқық қорғау органының өкілдері, базар әкімшілігі халыққа күнделікті түсіндіру жұмыстарын жүргізеді. Базарлардың бәріне күнделікті кезекшілік ұйымдастырылған. Базар әкімдігі күніне екі рет залалсыздандыру жұмыстарын атқаруда. Кіреберіс жерлерде санитарлық талаптар сақталған. Қала ішінде көптеген сауда орындары, банктер, кәсіпкерлік нысандары карантиндік талаптарға сәйкес жұмыс жүргізуі тиіс. Дегенмен тұрғындар да осы мәселеге көңіл бөлсе дейміз. Көпшілік орынға баратын кезде міндетті түрде бетперде тағып, сақтық шараларына мән берсе. Әркім өзінің денсаулығына жауапты, – деді аудан әкімі.

Аудан аумағында түсіндіру жұмыстары тұрақты атқарылуда. Ендігі кезекте кәсіпкерлер де, қала тұрғындары да жауапкершілікті сезінуі тиіс. Бұл туралы Шымкент қаласының Ақпараттық-коммуникациялық орталығы хабарлады.

Сұхбат

PhotoRoom