Елордада жедел жәрдем көліктерінің саны 2 есеге артты

Аймақ
22.09.2020, 11:44

Қалада індет өршіген кезде жедел жәрдем қызметіне күніне 3 мыңнан астам шақырту түсіп отырған

Елордада жедел жәрдем көліктерінің саны 2 есеге артты

Нұр-Сұлтанда медициналық жедел жәрдем станциясы мен полиция департаментіне 114 көлік сатып алынды. Оның 65-і полицейлерге, 14-і жедел жәрдем қызметіне берілді. Ал жыл соңына дейін станцияның медқызметкерлеріне тағы 35 автокөлік беріледі. Бұл туралы қала басшысы Алтай Көлгінов хабарлады.

«Бұған дейін 50-ден астам реанимобильдер алып бергенбіз. Осылайша жедел медициналық жәрдем станциясының автопаркі жылға жетпей екі жарым есе ұлғайды. (Өткен жылы желтоқсанда автопаркте 64 машина болса, қазір енді 165 болды)», - деп жазды ол.

Алтай Көлгінов Мемлекет басшысының тапсырмасы бойынша медициналық жедел жәрдем, Полиция департаменті, коммуналдық қызметтер, қоғамдық көлік және т.б. автопарктерін жаңартып, толықтырып отыруға барынша көңіл бөліп келе жатқанын айтты.

«Мәселен, тұрғындар бірінші кезекте жедел жәрдем қызметіне хабарласады, олардың әрбір минуты қымбат. Медицина қызметкерлері міне, бірнеше айдың жүзі болды коронавируспен күресте алдыңғы шепте жүр. Әрбір жанның өмірі үшін жанын салып, жұмыс істеп келеді. Жаңа реанимобильдерде алғашқы медициналық көмек көрсетуге арналған жасанды тыныс алу аппараты, ингаляциялық оттегі жүйесінің жинағы; монитор-дефибриллятор; электросорғыштар; артериялық қысым, қызу, тыныс алу жиілігін өлшейтін функциясы бар реанимациялық-анестезиологиялық монитор сынды барлық қажетті жабдық бар», - дейді ол.

Елордада індет өршіген кезде жедел жәрдем қызметіне күніне 3 мыңнан астам шақырту түсіп отырған.

«Маусымдық аурулар мен Covid-19 вирусын жұқтыру қаупін ескерсек, бұл автокөліктер біздің тұрғындарға барынша сапалы қызмет көрсетуге мүмкіндік береді. Індеттің өршіген тұсында жедел жәрдем қызметіне күніне 3 мыңнан астам шақырту түсіп отырды. Автопарк машиналарының 2,5 есе артқаны жедел көмек көрсетумен қатар медицина қызметкерлерінің де жұмысын айтарлықтай жеңілдетеді. Медицина мамандарын резидентурада оқытуға жарты миллиард теңге бөлінді, яғни бұл 300-дей грант», - деп түсіндірді.

Полиция қызметінің де автопаркі 65 көлікпен толықты (бұған дейін қосымша 13 автомашина берілгенді).

«ТЖ режимі кезінде Полиция департаменті қызметкерлері екі ай бойы блокбекеттерде тәулікбойы кезекшілікте болды, күндіз де, түнде де тәртіптің сақталуын қамтамасыз етіп келеді. Барлығы да тұрғындарымыздың қауіпсіздігі үшін жасалып отыр», - деп толықтырды әкім.

Сұхбат

PhotoRoom