Қазақстан өлім жазасын жою туралы халықаралық хаттамаға қосылды

Құқық
24.09.2020, 11:48

Қазақстанда өлім жазасын қолдану 2003 жылы тоқтатылған

Қазақстан өлім жазасын жою туралы халықаралық хаттамаға қосылды
фото: treta.com.br

Біріккен Ұлттар Ұйымының штаб-пәтерінде Қазақстанның БҰҰ жанындағы тұрақты өкілі Қайрат Омаров өлім жазасын жоюға бағытталған Азаматтық және саяси құқықтар туралы халықаралық пактісінің екінші факультативтік хаттамасына қол қойды. Бұл туралы ҚР Сыртқы істер министрлігінің баспасөз қызметі хабарлайды. 

Өлім жазасын жою туралы халықаралық хаттамаға қосылу туралы шешімді сол күні Қазақстан Президенті Қасым-Жомарт Тоқаев БҰҰ Бас ассамблеясының 75-ші мерейтойлық сессиясының жалпы саяси пікірталас барасында сөйлеген сөзінде жариялады. Ол Қазақстан өмір сүру мен адами қадір-қасиетке негізделген құқықты жүзеге асыруға бекем екенін атап өтті.

«2019 жылдың желтоқсанында Қазақстан Президенті елдегі саяси реформаларды жүзеге асыру аясында Сыртқы істер министрлігіне азаматтық және саяси құқықтар туралы халықаралық пактінің екінші факультативтік хаттамасына қосылу рәсімін бастауды тапсырды», - делінген ҚР СІМ баспасөз қызметінің хабарламасында.

Бұл халықаралық құжатқа қол қою өлім жазасын қолдану аясын біртіндеп тарылту және қылмыстық заңнаманы ізгілендіру бағытының жалғасы болып табылады. Қазақстан Республикасында өлім жазасын қолдану ҚР Президентінің 2003 жылы тиісті мораторий енгізу туралы жарлығымен толығымен тоқтатылды.

Сұхбат

PhotoRoom