ШЫМКЕНТТЕ ИНВЕСТИЦИЯЛЫҚ ЖОБАЛАР ҚАРҚЫНДЫ ДАМЫП КЕЛЕДІ

Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында экономиканы қарқынды дамыту үшін тек мемлекет қаржысына сүйену жеткіліксіз екенін айтып, жеке инвестициялар тарту арқылы іскерлік белсенділіктің артуына қолайлы жағдай жасауды тапсырды. 

Тәуелсіздік алған жылдар ішінде Шымкент – еліміздің кәсіпкерлік және индустриалды орталығына айналып үлгерді. Қазір үшінші мегаполисті сәулетті, қарқынды дамып келе жатқан мегаполис ретінде мақтанышпен айта аламыз. Оған бірден-бір дәлел, экономиканың көрсеткіштерінің бірі – негізгі капиталға бағытталған инвестициялардың нақты көлемінің жылдан-жылға артуы дер едім. Шымкент қаласы соңғы 30 жылда инвестициялық тартымды қалаға айналып, көптеген жаңа кәсіпорындар мен зауыт-фабрикалар ашылып, жергілікті тұрғындарды тұрақты жұмыс орындарымен де қамтамасыз етуде.

Ағымдағы жылдың қыркүйек айында «Жұлдыз» индустриалды аймағында ірі инвестициялық жобаның бірінші кезеңі – керамикалық плиталар шығаратын зауыт іске қосылды. Ашылу салтанатына қала әкімі Ғабит Сыздықбеков пен «WAN SHENG CERAMIC» шетелдік компаниясының құрылтайшылары қатысты.
 

Қала әкімі өз сөзінде ауқымды зауыт Орталық Азиядағы құрылыс индустриясындағы ең ірі жобалардың біріне айналатынын атап өтті. Мемлекет басшысының инвестиция тарту жөніндегі тапсырмаларын жүзеге асыру аясында бұл жоба барлық кезеңдерде жан-жақты қолдауға ие болды. Зауыттың ашылуы ішкі нарықты отандық құрылыс материалдарымен, яғни керамикалық плиталармен қамтамасыз етуге мүмкіндік береді.

Бұл ретте «WAN SHENG CERAMIC» ЖШС құрылтайшысы Ху Цзяньго жобаны жүзеге асыруда көрсеткен көмегі мен белсенді қолдауы үшін қала әкімдігіне алғысын білдірді. Оның айтуынша, компания заманауи технологияларды енгізумен қатар, қызметкерлерді дамытуға арналған түрлі бағдарламаларды жүзеге асыруды көздеп отыр.

Айта кету керек, инвестициялық жобаның құны 25,5 млрд теңге, ал оның жалпы аумағы 32 гектарды құрайды. Кәсіпорында 350 жұмыс орны ашылды. Зауыттың құрылысы өткен жылы басталып, мұнда заманауи технологиялық қондырғылар орнатылған, өндіріс барынша қауіпсіз әрі экологиялық таза болады.

Бірінші кезеңді іске қосу аясында кәсіпорын жыл сайын 12,7 млн шаршы метр өнім шығаруды көздеп отыр. Екінші кезең іске қосылғаннан кейін өндірістік қуаттылық екі есеге - 25,4 млн шаршы метрге дейін артады, тағы 350-ден астам қосымша жұмыс орны ашылады деп жоспарлануда.

Бұл жобаны жүзеге асыру құрылыс саласын дамытуға ғана емес, заманауи өндірісті енгізуге, жаңа жұмыс орындарын ашуға да септігін тигізеді.